U rubrici Knjiga Sedmice JU Gradska biblioteka Tivat ovog ponedjeljka preporučujemo knjigu “Tajni život drveća” (Laguna, Beograd 2017.) njemačkog inženjera šumarstva, predavača i publiciste Petera Volebena. Novina ovog ponedjeljka je što prikaz knjige sedmice nije napisao glavni urednik JU Gradska biblioteka Tivat (tj. ja), nego naš redovni čitalac, pratilac našeg rada i uvaženi sugrađanin g. Bojan Staničić.
„Danas kada čitava planeta govori o ekologiji, mi još uvijek zaboravljamo prvo da soslušamo prirodu. Ograničeni vlastitim intelektom i kratkim životnim vijekom, rijetko smo u mogućnosti da sagledamo širu sliku šume u kojoj su pohranjena hiljadugodišnja iskustva.
Baš ova knjiga otvara vidike i vrata u nevjerovatne sposobnosti drveća i otkriva nam njihovu važnost za sve nas. Smisao riječi kao što su: saradnja, prijateljstvo, bonton, škola, komunikacija, odbrana nikad ne bi spoznali u o ovom kontekstu da nije vrsnog poznavaoca šume Petera Volebena, autora knjige. Knjiga je napisana na jednostavan način, sa dosta zanimljivih i logičnih primjera.
Ipak, ako je pročitate površno, možete zaključiti da je u pitanju bajka. Pažljivo i promišljeno čitanje će vam otvoriti potpuno novu dimenziju i otkriti koliko buran i dinamičan život vode stabla i pored toga što su životno vezana za isti komad zemlje.
Jedno je sigurno: nakon ove knjige nećete šetati šumom na isti način. Ponovo ćete je gledati radoznalim očima djeteta otvorenim za čuda prirode“.
B.Staničić
Poslije ovog sažetog, ali izvanredno sublimiranog i usredotočenog Bojanovog prikaza Volebenove knjige, nema sumnje da će neko od naših čitalacâ doći u Gradsku biblioteku, posuditi i pročitati “Tajni život drveća”. Istovremeno koristim ovu priliku da pozovem sve naše čitateljke i čitaoce da nam predlažu knjige koje su pročitali i koje smatraju vrijednim, a takođe i da pišu prikaze takvih knjigâ koje će JU Gradska biblioteka Tivat objaviti u svojoj rubrici “Knjiga Sedmice”. S poštovanjem, glavni urednik JU Gradska biblioteka Tivat Miomir Abović
